Эзелтен ажырагыс биримдикте болгон боордош кыргыз-казак ааламын бүгүн “Чокон Валиханов: Тарыхтын жарык жылдызы” даректүү тасмасы дагы бир жолу бириктирди. Бүгүнкү бул тарыхый даректүү тасманын бет ачары Казакстан Республикасынын Президенти Касым-Жомарт Токаевдин Кыргызстанга болгон мамлекеттик расмий иш-сапарынын учурунда, «Кыргыз-казак жаштар форумунун» алкагында уюштурулду. Чокон Валихановдун 190 жылдыгына арналган “Чокон Валиханов: тарыхтын жарык жылдызы” аттуу даректүү тасма эки элдин ортосундагы маданий кызматташтыгын дагы да бекемдеп, «Чокон менен Манас» деген тарыхый тамырды илимпоздордун кѳз карашында талдаганга жетишти. Бет ачарга Кыргыз Республикасынын Мамлекеттик катчысы Марат Иманкулов, Казакстан Республикасынын маданият жана маалымат министри Аида Балаева, Казакстан Республикасынын Кыргыз Республикасындагы Атайын жана толук ыйгарым укуктуу элчиси Рапил Жошыбаев, Кыргыз Республикасынын маданият, маалымат жана жаштар саясаты министринин орун басары Марат Тагаев, “Манас” улуттук академиясынын президенти Азиз Биймырза уулу, Кыргыз Республикасынын «Эмгек Баатыры» Аскар Салымбеков, Кыргыз Республикасынын эл артисти, "Манас" орденинин ээси Түгөлбай Казаков, Ч.Айтматов атындагы Тил жана адабият институтунун директору, Казакстан Республикасынын "Достук" орденинин ээси, академик Абдылдажан Акматалиев, Кыргыз эл жазуучусу, эл аралык "Руханият" ассоциациясынын президенти Кайрат Иманалиев, Тарых илимдеринин кандидаты Кыяс Молдокасымов, Кыргыз эл жазуучусу Асан Жакшылыков, Ж. Баласагын атындагы КУУнун Мамлекеттик тил боюнча проректору, профессор Назаркул Ишекеев, профессорлор Курманбек Абакиров, Кадыралы Конкобаев, Аттокур Жапанов, Кыргыз Республикасынын эл артисттери, манасчылар Назаркул Сейдракманов, Рысбай Исаков, Кыргыз Республикасынын маданиятына эмгек сиңирген ишмер, жазуучу Бактыбек Максүтов, ошондой эле эки өлкөнүн маданият өкүлдөрү, тарыхчылар жана жаштары катышты. Тасма “Манас” улуттук академиясы жана “Барсбек Глобал” продакшн продюсердик борбору, директору Нуриза Чынтемирова тарабынан тартылып, Чокон Валихановдун тарыхый мурасын кеңири таанытууга арналат.